Inva nuk do t’ia dijë për ndarjen e Pirros nga Anja

Një proces gjyqësor që nuk dihet se sa do të zgjasë, për faktin se, si
Inva Mula ashtu dhe Pirro Çako kanë një qëllim të vetëm, atë të marrjes
së kujdestarisë së djalit të tyre. Nuk dihet deri tani se çfarë
strategjish po përdorin, por të dy artistët janë shumë këmbëngulës në
këtë pikë. Tashmë duket se nuk i lidh asgjë tjetër, dhe secili kërkon të
gjejë qetësinë e munguar në jetën personale. Por çdo të bëhet me djalin
e tyre 15 -vjeçar, Anthony, me kë do të pranojë të jetojë ai?! Të dy
synojnë kujdestarinë, ndërkohë që më shumë avantazh duket se ka Inva si
nënë, por edhe për faktin se jeta e djalit është ndërtuar në Paris.

Por
Pirro, i cili sapo i ka dhënë fund lidhjes me të dashurën e tij
juriste, Anjën, ndërkohë që po punon për përfundimin e albumit të tij të
ri kërkon të krijojë një jetë ndryshe, duke pasur edhe të birin pranë.
Nga rrëfime të miqve të përbashkët të çiftit, jemi informuar se Inva dhe
Pirro nuk shohin ndonjë mundësi reale rikthimi te njëri-tjetri, dhe se
arsyeja e shtyrjes së gjyqit ka qenë kryesisht kujdestaria e djalit. Të
dy artistët ua kanë lënë në dorë zgjidhjen e kësaj çështjeje pikërisht
avokatëve të tyre, ndërsa secili ka menduar ndonjë strategji personale
për të dalë sa më i fituar nga ky divorc.

Ka gati tetë muaj që
shqyrtimi i kërkesë-padisë së Mulës për divorc ka mbetur në fazën e
llogaridhënies mes dy bashkëshortëve, që rezultojnë të tillë vetëm “de
jure”. Edhe pse seancat janë zhvilluar kryesisht me dyer të mbyllura,
burimet tona kanë saktësuar se pyetjet e Çakos ndaj Invës janë
përqendruar në gjetjen e shkaqeve të kërkesës për divorc. Gjithashtu në
pyetjet e bëra të ditura është theksuar diskutimi edhe te përkujdesja e
djalit të tyre, që jeton bashkë me sopranon e famshme Mula në Paris.
Pirro ka mbështetur kërkesën e tij për marrjen e djalit, me faktin se
Inva nuk mund të jetë gjithmonë afër tij në një kohë kur ajo është e
angazhuar me aktivitetin e saj artistik me udhëtime në gjithë botën.
Sopranoja e njohur Inva Mula ndoshta kishte menduar ta mbyllte shpejt e
shpejt gjyqin e divorcit. Plani i saj ishte të martohej me biznesmenin
kosovar Et’hem Ramadani, martesë që s’u bë. Ndërkohë po ashtu dhe Pirro i
ka dhënë fund lidhjes dyvjeçare me juristen Anja, të cilës i kushtoi
dhe këngë me titull “Anjushka”.

Anthony,
nuk di cilin të zgjedhë

Por më konfuzi tani duket se
është Anthony-it 15- vjeçar, i cili nuk di kë të zgjedhë nga prindërit,
ndërkohë që jeton me të ëmën në Paris. Por në fakt edhe pse ai vjen
shpesh të vizitojë të atin në Tiranë, jeta e tij është e lidhur
kryekëput me Parisin, pasi atje është rritur dhe po shkollohet. Anthony,
edhe pse është në moshën e adoleshencës, e ka përjetuar me shumë maturi
këtë ndarje të prindërve, ndërkohë që dhe ai do të jetë një artist. Ai
studion për piano, dhe përsa u përket prirjeve, prindërit e tij kanë
dalluar talent për interpretim të muzikës lirike, si dhe në aktrim. Të
afërm të çiftit pohojnë se ai nuk është aspak indiferent ndaj shkrimeve
dhe komenteve që u bëhen prindërve të tij në media, pasi lexon dhe ndjek
me kujdes në internet çdo artikull që publikohet për prindërit e tij.

Pirro bën klip këngën
“Një tjetër
jetë”

Tashmë ai do t’i përkushtohet muzikës, edhe pse
dihet që krijimtaria e fundit muzikore ka qenë një përjetësim i jetës së
tij reale. Kështu Pirro Çako sapo ka bërë klip këngën e tij me titull
“Një tjetër jetë”, që e këndoi në festivalin e fundit të Këngës në
Radio-Televizion, për të cilën u diskutua se ishte një tjetër dedikim
për Invën. Klipi ka dy ditë që po transmetohet në kanalet muzikore
shqiptare. Idenë e tij për ribashkim, ai e kishte përjetësuar më parë me
këngën “Zemër e pakurdisur”, kënduar nga në festivalin “Kënga Magjike”
nga Soni Malaj.
Ai ishte vetë autor i tekstit dhe muzikës të kësaj balade, dedikuar
sopranos ku deklarohej se ai tashmë ishte mësuar me ndarjen. Kjo është
hera e tretë që Pirro kompozon këngë dhe shkruan vargje me historitë e
tij personale. Dy vite më parë, ai konkuroi vetë si këngëtar në
festivalin “Kënga Magjike” me këngën “Anjushka”, kushtuar ish-të
dashurës së tij Anja, arsyeja që e shtyu Invën të udhëtonte nga Parisi
dhe të depozitonte padinë për divorc në Gjykatën e Tiranës. Në ndryshim
nga “Zemër e pakurdisur”, ajo ishte një këngë me nota të gëzuara, ku ai
tregonte se si ishte njohur me të dashurën e tij të re. Ai madje si
fillim kishte plan ta bënte dhe klip atë këngë, por që nuk e realizoi.
Nuk dihet nëse kënga “Anjushka” do të përfshihet në albumin e tij të ri,
për të cilin po punon ta publikojë së shpejti.