Majtas jo djathtas' ne UTV, Cani godet serish ne shenje

Në një tjetër ekran, me një tjetër formulë. Arian Çani, Artur Zheji,
Andi Bushati nga 1 dhjetori bashkë në një format që nuk peshon as
majtas, as djathtas, por varet nga zhvillimet politike që dikton
momenti. Frymëzuar nga një libër i Artan Fugës, që titullohet “Majtas jo
djathtas” në UTV (Ufo Televizion), nga e hëna në të enjte, ofrohet 45
minuta polemikë të përnatshme nga ora 19.45-20.30. Një pyetje do të
ishte se çfarë i bashkon dhe çfarë i dallon për të qenë të tre në një
format aktualiteti Çanin, Zhejin dhe Bushatin?! Një pyetjeje si kjo,
Çani do t’i përgjigjej: “Jo konflikti, polemika. Por jo vetëm... Ka dhe
disa sekrete të tjera profesionale që e kanë bërë tashmë të suksesshme
këtë formulë që quhet “Majtas jo djathtas” ose shkurt MJD”. Ky format i
ri me Arian Çanin dhe dy polemistët e njohur, tashmë vetëm në UTV, një
kanal televiziv edhe në satelit, në kanalin 47 në dixhital.

Nëse
jeni kureshtarë të dini se cili do të jetë diskutimi që do të mbyllë
vitin 2010 nga studioja e re e Çanit, do të jetë pikërisht çështja e
kutive. A do digjen kutitë në 2010? Apo do digjen në 2011? Si dhe gjithë
dilemat dhe pikëpyetjet që ngrihen rreth kësaj historie. “Ndërsa në
2011, nëse nuk ka plasur ndonjë bombë deri në datën 3 janar, do t’ju
dhurojmë një horoskop politik dhe jo vetëm të 2011-s...”, tregon Çani.
Titulli i emisionit është fleksibël, pra që nuk e përcakton realisht
drejtimin politik të këtij programi. Kjo do të thotë që do të jenë
kritikë njësoj si për të majtët, ashtu dhe për të djathtët!

Dhe
Çani përgjigjet se, “rasti rastit nuk i ngjan... Varet nga fabulat.
Bushati dhe Zheji janë polemistët më të talentuar që ka ky vend. Ata e
dinë vetë se ç’bëjnë”, vazhdon ai. Nga emisioni “Zonë e lirë”, në këtë
format duket se do diktohen bindjet e publikut herë majtas e herë
djathtas. Në këtë moment politik, a është i domosdoshëm një orientim i
tillë? “Po sigurisht”, thotë ai “tani më shumë se kurrë. Erdhën
zgjedhjet e 8 majit!” Dhe tashmë që do e shohim në dy ekrane të
ndryshme, si do të ndihej ai nëse Ariani i MJD-së do të rrëmbente më
shumë audiencë se Ariani i “Zonë e lirë”?! “Kjo është e pamundur, të
gjithë në një thes janë. Pa merak”, përgjigjet ai.