Bledi Strakosha, në një rrëfim "Blue"

Nën një sfond
blu... nën tingujt e pianos... nën dritën e një shandani... të ulur në
kolltuk si të jenë në një ambient familjar... një bisedë e ngrohtë, ku
thuhen ato që s’janë thënë më parë... Kjo është joshja e “Blue”.

Mënyra që Bledi Strakosha ka zgjedhur për të “zbërthyer”, të ftuarit e
tij. Në fakt karriera e tij televizive nuk do të mund të kuptohej tashmë
pa “Blue”. Emisioni që qysh në fillimet e veta do të tërhiqte një
audiencë të madhe edhe pse ai realizohet në orët e vona të mbrëmjes.
Mysafirët e tij janë personalitete të botës së artit por edhe të
politikës, biznesit apo diplomacisë. Të paktën ky ka qenë gërshetimi i
personazheve që ka bërë ideuesi i programit Strakosha në programin e tij
televiziv “Blue”, që transmetohet çdo të djelë në mbrëmjen e vonshme në
televizionin “Klan”.

Ka intervistuar emra të famshëm nga
politika, arti, kultura, shkenca, si; ish presidenti Alfred Moisiu,
kryeprokurorja Ina Rama, Ardit Gjebrea, Aurela Gaçe, Yllka Mujo, Eli
Fara, Timo Flloko, etj. E gjithsesi për të qenë realist “Blue” shënon
sukses në një kohë që janë shtuar të tillë formate. Bledi ka patur besim
tek programi i vet qysh në fillimin e tij, duke argumentuar edhe arsyen
përse njerëzit duhet të shohin “Blue”, e jo një tjetër emision. “Sepse
aty thuhen gjëra të vërteta, të pathëna tjetërkund e për më tepër nga
njerëz që kanë zgjedhur të rrëfehen vetëm aty”, tregon ai

Por në
këtë intervistë për revistën “Shqip” Bledi flet më tepër se kaq. Ai që
s’mund të rrëfehet në emisionin e vet, rrëfehet për ne...

INTERVISTA




Si nisi ky format?
“Blue” rifilloi rrugëtimin e tij në Klan në muajin më të nxehtë të
vitit të para dy viteve, në gusht. Me pak ndryshime, por që ishin
thuajse të pandjeshme. E menduam gjatë me stafin dhe vendosëm se
ndryshimet e mëdha do të ishin të panevojshme, pasi në fund të fundit,
ky program u rikthehye në ekran sepse ka qenë i suksesshëm. Ndaj e pamë
të arsyeshme t’i qëndrojmë sa më besnikë formatit të tij të dikurshëm,
duke ndryshuar vetëm paksa skenografinë.

Cilat janë
personazhet që të kanë lënë më shumë mbresë në këtë sezon? Mund të na
zbuloni disa emra?
Personazhet kanë qenë nga fusha të
ndryshme, që nga artistët e deri tek politikanët, biznesmenët apo
diplomatët. Personazhin e parë që e nisa ishte Yllka Mujo një ikonë e
artit dramatik shqiptar, por mund t’ju them se personazhet të gjithë
kanë qenë të zgjedhur me shumë kujdes. Gjithkush i ftuar në “Blue”, ka
patur eksperienca jete të veçanta e diçka me vlerë për t’u rrëfyer. Disa
prej të ftuarve kanë qenë ish presidenti Alfred Moisiu, kryeprokurorja
Ina Rama, Ardit Gjebrea, Aurela Gaçe, Yllka Mujo, Eli Fara, Timo Flloko,
etj. Një risi tek të ftuarit do të jenë emrat e artistëve të rinj në
moshë, por me një karrierë të gjatë, të cilëve do t’u jepet mundësia
edhe të na dhurojnë copëza interpretimi nga karriera e tyre live në
program. Si dhe shumë artistë të rinj.

Nëse në kohën që
nisi “Blue” kishte pak për të mos thënë fare të tillë programesh, gjatë
viteve të fundit këto lloj formatesh kanë hyrë shumë në modë. A keni
frikë nga kjo lloj konkurrence?
Aspak! Me modesti mund t’ju
them se nëse unë vendos të bëj diçka në TV, e kam menduar e përpunuar
gjatë këtë ide, e nëse vendos ta nis do të thotë që jam gati t’i ofroj
publikut produktin më cilësor. Përtej kësaj, siç e thoni edhe ju, “Blue”
ka qenë një nga programet e para të këtij formati në vendin tonë, çdo
“kopje” e tij do të vazhdojë të mbetet e tillë...

A
mendoni se e keni fituar audiencën që keni pasur edhe në këtë kohë
“dyndje” emisionesh?
Them se po. “Blue” fatmirësisht nuk ka
qenë ndonjëherë pjesë e formateve rutinë siç ndodh shpesh në TV-të
tona. Gjithnjë jemi munduar të respektojmë vëmendjen dhe kohën që
publiku na ka dhuruar, rrjedhimisht mendoj se ata do të dinë të
vazhdojnë të jenë besnikë ndaj nesh.

Përse njerëzit duhet
të zgjedhin pikërisht të shohin programin tuaj?
Sepse aty
thuhen gjëra të vërteta, të pathëna tjetërkund e për më tepër nga njerëz
që kanë zgjedhur të rrëfehen vetëm aty.

Ju jeni një
njeri i ekranit. Sa e ndiqni ju televizorin?
Mjaftueshëm,
por ndjek kryesisht dokumentarët e filmat. Më ngjallin gjithashtu
interes projektet e reja që realizohen në TV-të e ndryshme, pasi më
duhet të njihem me atë çka tregu mediatik ofron sot për sot.

Cili
është emisioni juaj i preferuar; shqiptar apo i huaj?
I
huaj, versioni Britanik i “Blue” me titullin “This is your life...”.
Shqiptar janë “Zonë e Ndaluar” që jepet në Klan dhe “Exclusive” që
transmetohet në Top Channel.

Për një sezon veror ju
realizuat programin “Vila e Sekreteve” në Top Channel. Përse nuk e
vazhduat atë emision sërish, apo nuk pati suksesin e “Blue”?
“Vila e Sekreteve” vazhdoi për 8 javë rresht dhe kontrata me Top
Channel qe pikërisht për një projekt që do të zgjaste vetëm 8 javë.
Arsyeja përse zgjati kaq pak ishte e thjeshtë: në çdo program ftoheshin 6
personazhe nga e njëjta fushë. Ju e dini po aq mirë sa edhe une se sa e
vështirë është në një vend kaq të vogël sa Shqipëria të gjesh 6
personazhe cilësorë çdo javë, ndaj e menduam të arsyeshme të realizonim
një program më “jetë shkurtër” por cilësor.

Ndërkohë jemi
duke pritur verën. Çfarë është vera për ju?
Në fakt s’mund
të them se vera më pëlqen në mënyrë të veçantë. Realisht stina ime e
preferuar është dimri. Vera është një stinë pushimesh e çmalljesh, sepse
njerëzit kanë më shumë kohë për njëri-tjetrin dhe të gjithë jemi me të
gatshëm për t’u organizuar në destinacione të përbashkëta, gjë që në
periudha të tjera të vitit, kur angazhimet janë më të shumta, është më e
vështirë të ndodhë.



A keni bërë plane për
pushime dhe mund të na tregoni diçka rreth tyre?
Kryesisht
gjatë verës kam si jugun e Shqipërisë që e dua aq shumë, meqë edhe me
origjinë jam prej andej. Por nuk e fsheh që kam dëshirë që të shkoj edhe
në një vend të largët ku mos të punojë telefoni

Cilat
janë vendet tuaja të preferuara në Shqipëri për të pushuar?
Dhërmiu padiskutim, fshati nga i cili familja ime vjen, por dhe Himara e
Saranda.

Cila është gjëja që të mërzit?

Ligësitë dhe rutina.

Po gjëja që të argëton më shumë?
Një mbrëmje mes miqsh.

Ku e gjen frymëzimin për të
rinisur diçka?
Tek dëshira për të bërë diçka më mirë se
herën e fundit që e kam bërë.

Cili është gabimi yt më i
madh për të cilin je penduar më pas?
Jam penduar vetëm që
një pasdite m'u desh t'ia lija qenin tim Willin disa miqve sepse më
duhej të punoja, e atë pasdite atë e shtypi makina e unë s'gjendesha
pranë tij.

Cila është arritja jote më e madhe?
Fakti që kam ende shumë për të arritur, sepse fundi yt fillon kur
mbërrin majën. Fatmirësisht majën unë ende s'e shoh...

Kush
janë shkrimtarët e tu të preferuar?
Të gjithë shkrimtarët e
mirë, por më së shumti Sheksprin.

Çfarë është gjëja që
nuk të pëlqen në jetë?
Fakti që shpesh shajmë të tjerët
sepse na duket vetja më mirë.

Cila është cilësia që çmon
më shumë tek vetja?
Sinqeriteti.

Po tek të
tjerët?
Besnikëria.

Në cilat raste gënjen?
Në rastet kur duke thënë të vërtetën mund të lëndojë dikë.

Cila
është fjala apo fjalia, që përdor më shpesh?
Faleminderit,
mendoj. Gjithsesi s'jam i sigurt.

Kush apo çfarë është
dashuria më e madhe e jetës tënde?
Familja dhe dy qentë e
mi. Në kuptimin profesional: televizioni.

Nëse nuk do të
kishe zgjedhur ekranin çfarë talenti do të doje të kishe?

Do kisha dashur të kisha "investuar" ca më shumë për të mësuar ndonjë
instrument muzikor.

Cila është gjendja shpirtërore
aktuale?
E kënaqshme.

Cila është gjëja më e
çmuar, që ke?
Jeta.

Cilët janë heronjtë e
tu?
Prindërit e mi.

Çfarë vlerëson më shumë
tek miqtë?
Sinqeritetin dhe besnikërinë.

Me
çfarë motoje zgjohesh në mëngjes?
Ji vetvetja, cili do
qoftë çmimi.

Cila është dashuria më e madhe e jetës
tënde?
Dashuria për familjen dhe qentë e mi.

Çfarë
të ka lënduar më së fundi?
Humbja e këlyshëve të qenve të
mi.

Do të pranoje të bëheshe pjesë e një reality show?
Unë gjithnjë them: “Kurrë mos thuaj kurrë”, por tani që po e mendoj,
them se jo. Megjithatë, asnjëherë s’i dihet.

Cila është
gjëja që nuk do ta bëje kurrë?
Të tregohesha mosmirënjohës.


Po një gjë që e bën me qejf përherë?
T’i
shpreh dashurinë personave që dua. Shpesh këtë e bëj me gjeste, e jo me
fjalë... Revista Shqip