Vëzhguesit vendorë: Incidentet krijuan klimë tensioni

Koalicioni i Vëzhguesve Vendorë publikoi të parin raport
paraprak të enjten, për fushatën elektorale të 8 majit. Në të thuhet se
"incidentet e ndodhura së fundmi kanë krijuar një klimë të lartë
tensioni dhe frikë në lidhje me pritshmërinë dhe ecurinë e mëtejshme të
fushatës”.
Koalicioni dënon ashpër të gjithë incidentet e ndodhura si
dhe individët apo subjektet e përfshira në to. "Në vazhdimësi të
monitorimit të situatës vërehen një sërë elementësh, shkruhet në raport,
të cilat ndikojnë direkt apo indirekt në rritjen artificiale të klimës
konfliktuale”.
Në këtë pikë veçohet retorika politike e partive apo kandidatëve në
garë. Koalicioni përshëndet prononcimin e kryetarit të Partisë
Demokratike, njëkohësisht kryeministrit Berisha, i cili dënoi
incidentet, ndërsa i kërkon kryetarit të Partisë Socialiste Rama,
njëkohësisht kandidat për bashkinë e Tiranës, të moderojë termat dhe
retorikën politike si dhe të dënojë publikisht të gjithë rastet dhe
autorët e dhunës dhe të konflikteve të ndodhura.
Organizata monitoruese e zgjedhjeve, u tërheq vëmendjen kandidateve
apo degëve lokale të tre partive kryesore, PD, PS e LSI, të heqin dorë
nga trajtimi i kësaj gare elektorale administrative si një betejë për
luftë a vdekje dhe të japin mesazhe prosperiteti dhe bashkëpunimi.
Më tej në raport thuhet se "ka raste të ushtrimit të presionit apo
kërcënimeve ndaj punonjësve të administratës qendrore dhe lokale, jo
vetëm për të votuar ndaj subjektit të forcës politike të titullarit, por
edhe për t’i angazhuar në fushatë për të siguruar votat e rrethit
familjar apo si pjesëmarrës në mitingjet partiake”.
Një tjetër shkelje, sipas Koalicionit vëzhgues është pajisja e
shtabeve elektorale të PD me listat me të dhëna personale të punonjësve
të administratës, votues në zonat pranë këtyre shtabeve.
Koalicioni ka tërhequr edhe më përpara vëmendjen për detyrimin ligjor
të Kryetarëve të Njësive Vendore për caktimin e vendeve të afishimit të
materialeve propagandistike për subjektet garuese, të cilat vazhdojnë
të bëhen shkak i grindjeve apo incidenteve midis simpatizantëve dhe
militantëve të forcave politike.
"Policia e Shtetit duhet të mos bjerë pre e provokimeve dhe
paragjykimeve të politikës në trajtimin dhe hetimin e këtyre ngjarjeve,
por të jetë në shërbim të ligjit dhe interesave të qytetarit duke
mbrojtur me përpikmëri liritë dhe të drejtat e tyre”, nënvizohet në
raport. Attachments: Image 1