Gjoba për naftëtarët

Importuesit e mëdhenj të naftës më nuk do të kenë atë komoditet
që çmimet e tyre t’i caktojnë me marrëveshje mes tyre. Ata janë në
shënjestër të Komisionit të Konkurrencës. Javët e fundit, ky komision ka
intensifikuar punën e tij për të hulumtuar arsyet e kësaj praktike të
bashkërenduar në mes të importuesve për caktimin e çmimeve. Shumë
shpejt, Komisioni do të dalë edhe me vendimin për hetimin e rreth 30
kompanive që merren me këtë biznes. Udhëheqës të Komisionit
të Konkurrencës thonë se kanë përfunduar fazën e parë, ku të gjithë
importuesit kanë plotësuar pyetësorët e këtij komisioni. Krejt ky hetim
ka ardhur si pasojë e dyshimit të Komisionit për fiksimin e çmimeve nga
kompanitë importuese të naftës. Këta tregtarë mund të pësojnë të njëjtin
fat, sikurse kompanitë e sigurimeve që vitin e kaluar ishin dënuar me
nga 100 mijë euro për një marrëveshje të fshehtë të tyre, shkruan
Express.
Osman Ejupi, drejtues i Autoritetit Kosovar të Konkurrencës, tha se
janë duke bërë punë intensive në hetimet e nisura për naftëtarët e
mëdhenj dhe gjatë javës ai thotë se mund të priten edhe vendimet për ta.
“Nga analiza e pyetësorëve rezulton se këta importues i kanë kryesisht
çmimet e njëjta, e në veçanti kur lokacionet e pompave të tyre janë afër
njëri-tjetrit. E, njëjtë nuk po na rezultojnë edhe çmimet furnizuese,
të cilat nuk i kanë të njëjta. Në krejt këtë fshihet një praktikë e
bashkërenduar apo të them një marrëveshje e pashkruar mes tyre”, ka
thënë ai.
Përveç naftëtarëve, ai tregon se janë duke u hetuar edhe kreditë e
bankave, ku ka përfunduar faza me pyetësorë dhe tani janë duke kryer
analizat e tyre. Ai ka bërë të ditur se dënimet për kompanitë importuese
të naftës janë nga 1 deri në 10 për qind në bazë të qarkullimit vjetor.
Ai ka treguar se pjesë e hetimeve kanë qenë edhe disa prej
naftëtarëve të vegjël. Por Shoqata e Naftëtarëve nuk e pranon se mes
tregtarëve kosovarë ka marrëveshje për fiksimin e çmimeve. Nazmi Bytyqi,
kryetar i kësaj shoqate së naftëtarëve, ka thënë për Express, se ata
bashkëpunojnë me Komisionin dhe si shoqatë nuk i ikin ligjit, por nuk
pranon se ka marrëveshje në tregun vendor.
“Nuk mendoj se qëndron marrëveshje mes tyre, e nëse veç ata hetojnë
këtë, atëherë është Ligji i konkurrencës në bazë të cilit edhe Komisioni
mund t’i marrë vendimet”, ka thënë Bytyqi. /Telegrafi/