Kopjet ....

Në
kohën kur gjithandej Kosovës hapeshin shitore “Gjithçka 1 euro”,
gojëkëqijtë thoshin: “Nejse, na duhen ato, se edhe jeta në Kosovë
kushton 1 euro!”...








Behxhet Haliti

Në kohën kur gjithandej Kosovës hapeshin shitore “Gjithçka 1 euro”,
gojëkëqijtë thoshin: “Nejse, na duhen ato, se edhe jeta në Kosovë
kushton 1 euro!”...

Tash, për më keq, po kuptojmë se jeta na është bërë edhe kopje!

Pse?

Jemi pa letra!

Pa letra origjinale!

Ato i ka marrë Serbia në mënyrë të dhunshme dhe tash Borko i ofron Editës – kopje! Po, po – kopje!

Kopje të librave amzë (lexo: kopje të identitetit tonë)!

Kopje të librave kadastralë (lexo: kopje të dheut tonë)!...

E, nesër, do t’i ofrojë edhe kopje të targave të automjeteve, pastaj
kopje të telave të rrymës elektrike, kopje të eksponateve arkeologjike
të plaçkitura nga Muzeu i Kosovës, kopje të dëftesave të pensioneve të
vjedhura, kopje të hartës ajrore të Kosovës, kopje të pikave doganore 1
dhe 31, kopje të mbetjeve mortore nga varrezat masive në Serbi, kopje të
pjesës së Kosovës përtej Urës së Ibrit dhe – në fund – edhe kopje të
hartës së Kosovës...

Nëse si Kosovë na është thënë me rezolutë ndërkombëtare se duhet
biseduar me Serbinë, në atë rezolutë nuk është thënë se të gjitha punët
sa i përket bisedimeve duhet të bëhen me kopje!...

Nuk është kopje, por i ngjet kopjes, kur më 8 mars shkoi dikush i
Kosovës në Bruksel për t’i nisur “triumfalisht” bisedimet me Serbinë, pa
ia dhënë lejen Kuvendi i Kosovës!

Nuk është kopje, por i ngjet kopjes, delegacioni që shkoi në Bruksel!

Nuk është kopje, por i ngjet kopjes, kur, dy ditë pas fillimit të
bisedimeve Kosovë-Serbi, Kuvendi i Kosovës, në seancën plenare, miratoi
me shumicë votash (63 pro, 48 kundër e 1 abstenim), një “kopje-rezolutë”
për dialogun mes Republikës së Kosovës dhe asaj të Serbisë për çështje
praktike.

Nuk është kopje, por i ngjet kopjes, që ai dokument “do t’i japë
Parlamentit të Kosovës një të drejtë që të mbikëqyrë, që të përcjellë,
rrjedhën e bisedimeve dhe të drejtën që për çdo rast të kërkojë sqarime
në Parlament”.

Nuk është kopje, por i ngjet kopjes, “agjenda” e bisedimeve, të cilën nuk e pa kush deri më sot!

Nuk është kopje, por i ngjet kopjes, deklarata e
“kopje-kryenegociatores” kosovare, kur thotë se Prishtina do të kërkojë
nga Bashkimi Evropian qartësimin e përfitimeve që do t’i ketë Kosova nga
këto bisedime! (Lexo: Ajo nuk e di pse ka shkuar në Bruksel!).

Hej, edhe rezultati do të jetë kopje!

E, me atë kopje, Evropa do t’ia çelë edhe më shumë dyert Serbisë për në Evropë!

Kosova do të përfitojë “përmirësimin e jetës së qytetarëve”. Kështu është thënë zyrtarisht!

Ama, të jetës – kopje!

Ndashtë, se kemi kopje-institucione, kopje-politikë, kopje-ekonomi, kopje-standard, kopje-ushqim, kopje-ajër, kopje-ujë...

Kemi rënë nën “Gjithçka 1 euro”!

Tash nuk kemi më punë me shitoret “Gjithçka 1 euro”, por me lokalet e vogla ku shkruan: “Bëjmë fotokopje!”...

Një kopje – 2-5 cent!