Presidenti Topi uron Presidentin e Shteteve të Bashkuara të Amerikës, Barak Obama për Festën Kombëtare.

Presidenti Topi uron Presidentin e Shteteve të Bashkuara të Amerikës, Barak Obama për Festën Kombëtare.







Tërhequr më 10 Korrik 2009


3 korrik 2009

Presidenti i Republikës, Bamir Topi i dërgoi një mesazh urimi
Presidentit të Shteteve të Bashkuara të Amerikës, Barak Obama me rastin
e 4 korrikut, 233-vjetorit të Ditës së Pavarësisë.

“I nderuar zoti President,

Dita e Pavarësisë së Shteteve të Bashkuara të Amerikës më jep
kënaqësinë e madhe që, në emër të popullit shqiptar dhe në emrin tim
personal, t’ju përcjell Juve dhe popullit mik amerikan urimet më të
ngrohta dhe më të përzemërta, si dhe suksese në përballjen me sfidat e
mëdha kombëtare dhe globale!

Dëshiroj, zoti President, që me këtë rast, të shpreh bindjen se niveli
i shkëlqyer i marrëdhënieve dy dhe shumëplanëshe midis Shqipërisë dhe
SHBA-ve do të pasurohet dhe forcohet më tej në të ardhmen, në të mirë
të dy vendeve e popujve tanë miq.

Mbështetja e gjithanshme që vendi juaj i madh i ka dhënë e i jep
Shqipërisë, në konsolidimin e parimeve universale të lirisë e
demokracisë, në procesin e ndërtimit të një shoqërie të lirë, të një
shteti të së drejtës dhe të institucioneve të pavarura, përbën shpresën
dhe besimin se populli im do të fitojë betejën e vështirë për
demokracinë.

Së bashku me ndjenjën e thellë të mirënjohjes ndaj Jush dhe vendit tuaj
dëshiroj t’ju siguroj, zoti President, për angazhimin maksimal, timin e
të popullit tim, në miqësinë tradicionale dhe partneritetin e ri me
popullit mik amerikan.

Populli shqiptar, zoti President, zgjodhi me vendosmëri të qëndrojë në
krah të popullit amerikan dhe vendeve anëtare të Aleancës së Atlantikut
të Veriut, i bindur se kjo është rruga e vetme drejt stabilitetit,
sigurisë dhe zhvillimit afatgjatë, kombëtar dhe rajonal dhe prova
dinjitoze për t’iu bashkuar përpjekjeve për një botë më të mirë dhe më
të sigurt.

Duke ju siguruar për ndjenjat e thella të miqësisë së popullit shqiptar
dhe me përshëndetjet më të sinqerta, ju lutem pranoni, i nderuar zoti
President, shprehjen e konsideratës sime më të lartë!” - thuhet në
mesazhin e Presidentit Topi.