A do të anëtarësohet gjatë këtij viti Kosova në BERZH?

Autoritetet kompetente të Kosovës, presin që gjatë këtij viti
Kosova të anëtarësohet në Bankën Evropiane për Rindërtim dhe Zhvillim
BERZH). Sipas tyre, anëtarësimi i Kosovës në këtë mekanizëm financiar
për vitin 2010, është penguar nga zgjedhjet e 12 dhjetorit. Kosova
gjatë këtij viti pritet të anëtarësohet në Bankën Evropiane për
Rindërtim dhe Zhvillim, thotë Ahmet Shala, ministër në dorëheqje i
Ekonomisë dhe Financave. Sipas tij, ky proces është dashur të përfundojë
në fund të vitit që lamë pas, por zhvillimet e fundit politike dhe
zgjedhjet e 12 dhjetorit, e kanë zvarritur këtë proces.

“Ne kemi pasur premtime që kjo do të realizohet në fund të vitit 2010,
por fatkeqësisht ndodhi çfarë ndodhi me presidentin e shtetit dhe me
Qeverinë dhe ishte vështirë për të pritur që ndonjë shtet të japë votën,
kur mungonte kreu i shtetit dhe qeveria”, tha ministri në largim Ahmet
Shala, për Radio Evropën e Lirë.
Në anën tjetër, njohës të çështjeve ekonomike, thonë se prania e kësaj banke në tregun kosovar, është e një rëndësie të madhe.
Ndryshe, që nga përfundimi i luftës së fundit në Kosovë, Banka
Evropiane për Rindërtim dhe Zhvillim vazhdimisht ka ndihmuar projekte të
ndryshme, si në sektorin publik, ashtu edhe në atë privat.