Java e 7 Shkumbini “likujdon” Flamurtarin 3-1

Published on October 17, 2010 by WebMaster   ·   No Comments

Të dielën, në Peqin, Shkumbini vendës ka pritur Flamurtarin e ambicieve të mëdha këtë sezon, që gjendej në vendin e dytë të klasifikimit. Bardhekaltrit, edhe ata të përforcuar ndjeshëm këtë kampionat, kanë arritur një fitore bindëse dhe tepër të cmuar, me rezultatin 3-1, duke u “treguar vendin” kuqezinjve të Vlorës.

Plot 3 gola kanë shënuar peqinasit në portën e Mockës, ndërsa Daniel Xhafaj ka arritur të realizojë golin e nderit për vlonjatët. Një ndeshje e luaftuar fort nga të dyja palët, por e kurorëzuar me sukses nga vendësit, edhe për faktin se janë treguar më të saktë dhe konkretë, ndërkohë që miqtë kanë krijuar volum loje, por pa shumë efikasitet. Pa kaluar shumë minuta, janë peqinasit, që me anë të mesfushorit Fejzo Shenaj shënojnë golin e parë. Kronometri i gjyqtarit Taullaraj shënon minutën e 13-të, kur bardhësia e fillimit të ndeshjet prishet. Vetëm katër minuta më pas, janë vlonjatët që barazpeshojnë cdo gjë. Goleadori i njohur i Flamurtarit, Daniel Xhafaj, ka barazuar rezultatin 1-1, pikërisht në minutën e 17-të, duke treguar se kjo ndeshje do të ishte mjaft emocionuese dhe me përmbysje. Por, në fakt, kjo e fundit ka marrë vlerë vetëm në funksion të Shkumbinit, që në pjesën e parë ka shënuar edhe dy herë të tjera, me të njëjtin autor, mbrojtësin lezhian Robert Grizha. Ky i fundit ka realizuar në minutën e 32-të dhe të 38-të, duke vulosur në fakt edhe fitoren e përgjithshme 3-1 të Shkumbinit ndaj Flamurtarit. Sepse pjesa e dytë, edhe pse është shoqëruar me raste të volitshme, nuk ka prodhuar gola të tjerë. Kujtojmë se nga minuta e 41-të, të dyja skuadrat kanë luajtur me nga një lojtar më pak, për shkak se Gjyla dhe Daniel Xhafaj kanë dalë jashtë loje me kartonë të kuq, pas një përplasjeje që kanë pasur me njëri-tjetrin. Në këtë mënyrë, Flamurtari del duarbosh nga kjo transfertë, ndërsa Shkumbini rigjen fitoren, ndoshta edhe qetësinë e duhur, për të vijuar në këtë rrugë në ndeshjet në vazhdim. Sepse janë një skuadër me pritshmëri të mëdha nga drejtuesit dhe tifozët peqinas, por deri më tani kanë zhgënjyer jo pak. Madje kanë “ngrënë kokën” e një trajneri, të Mirel Josës, që u shkarkua menjëherë pas javës së dytë të kampionatit. Pasuesi i tij, Agim Canaj, e nisi aventurën peqinase me një fitore të bujshme, 3-1 ndaj Skënderbeut, ndërsa më pas nuk ka pasur rezultate të mira. Interesant për këtë ndeshje ka qenë fakti se një vlonjat, si Agim Canaj, drejtonte Shkumbinin, ndërsa Flamurtarin e drejtonte një “peqinas 24 karatësh”, emblema dhe një nga emrat e mëdhenj që ka nxjerrë futbolli i këtij qyteti, Gugash Magani. Sporti Shqiptar

nuk bom naj loje kushedi pjesen e dyte ishim dobet
gjithsesi fituam kjo eshte e rendesishem per ekipin tone te zemres me kete fitore arrijm ne kuoten e 8 pikeve
Urime Shkumbini