Besa Kokedhima: Dita ime? Ja me kë e ndaj kohën

Nga Eraldo Rexho

Besa së fundmi të kemi parë të shfaqesh në ekran me një bashkëpunim shumë të suksesshëm me këngëtaren Jehona Sopi. Si lindi ideja për të dhe cili është komenti më i bukur që keni marrë deri më tani?

Unë dhe Jehona kemi një miqësi të hershme. Gjithnjë kishim diskutuar për një bashkëpunim, por mungesa e një projekti konkret i kushtëzonte pak bisedat tona. Kjo deri në një moment kur Jehona më tregoi një demo që kishte nga Enis Presheva. Mua më pelqeu shumë e kështu nisi gjithçka. Më vjen shumë mirë që është pritur me entuziasëm, dhe i falenderoj të gjithë mbështetësit e mi, pasi komentet pozitive kanë qenë dhe vazhdojnë të jenë të shumta. I fundit është ndofta komenti që përfshihet brenda pyetjes suaj.

Ky klip solli në sytë e publikut një Bes ndryshe, që këtë herë qëndroi shumë larg të bardhës dhe të zezës, solli një Bes me ngjyra. Si erdhi ky ndryshim tek ju dhe kush u kujdes për veshjen tuaj në këtë klip?


Për veshjet e mia u kujdes Niko Komani. Puna e parë me Nikon ishte kopertina e Revistës Anabel, ku Niko është dhe redaktor mode. Nga ai bashkëpunim, une ia besova Nikos imazhin që do të përdornim për këtë video. Është ndryshe nga gjithçka unë kam bërë më parë, por mendoj se stili i përzgjedhur shkon më së miri me këngën dhe atmosferën e videoklipit. Unë gjej rastin ta falenderoj Niko Komanin si dhe të gjithë bashkëpunëtorët që kanë investuar në këtë projekt, Enis Preshevën & Big Basta (kompozimi dhe teksti), Entermedian për videoklipin, si dhe Geljant Kalecin për setin fotografik të kësaj kënge.

Do të na tregosh ndonjë prapaskenë interesante nga klipi?

Skena në makinë ku unë dhe Jehona duhet të grindeshim me djalin e të shfaqnim shenja nervozizmi ishte për ne shumë komike, pasi ishte e vështirë të “qortonim” dikë me “sustë” kur pak me parë po qeshnim e bisedonim.(Qesh)

I ke munguar festivaleve shqiptare, për të na përfaqësuar të gjithëve ne denjësisht në një festival të rëndësishëm siç është Festivali Ndërkombëtar i Ohrit. Si u ndave nga ky konkurrim dhe cilat janë emocionet që more me vete?

U ndjeva mjaft mirë. Fitova çmimin “Performanca më e mirë”.

Sidoqoftë, arsyeja kryesore pse u gëzova ishte pse përfaqësoja Shqipërine, e jo vetëm veten time.

Për të mos u larguar nga festivalet, nga skena, cili është momenti më i bukur që ke kaluar mbi një skenë?

Në “Top Fest 5” (2008), kur konkurroja me këngën “Engjëjt vrasin njëlloj”. Në momentin kur më kanë dorëzuar çmimin kam qenë e lumtur dhe e emocionuar si rrallëherë!


Je përzgjedhur për të kënduar në koncerte të këngëtarëve shumë të famshëm në botë, si mendon çfarë të bën të dallueshme ty ngë këngëtaret e tjera?

Është më mirë të pyesni ata që më kanë përzgjedhur mua në evente të tilla..(qesh)

Kaq vite karrierë të mbushura me kaq shumë suksese. A ka Besa një çelës suksesi?

Mendoj se të gjithë “fituesit” e kanë një çelës suksesi, por sa më të ndërgjegjshëm të jenë për këtë çelës, aq më pak të gatshëm janë që ta tregojnë atë..! (Qesh)(shaka)

Plani më i afërt në muzikë cili është?

Së shpejti publikohet videoklipi im më i ri i këngës “Kalorësi i natës” i cili do të prezantojë edhe albumin tim të II-të.

Tani edhe nje pyetje te fundit për përditshmërinë e Besës… Si nis dhe si përfundon një ditë e juaja?

Zakonisht një kohë të mirë e kam të impenjuar me kontakte për projekte të ndryshme muzikore. Përditshmëria përtej kësaj, familja dhe partneri im, miqtë, letërsi, piano, radio, etj.