Argjentina Ramosaj: Koha për një baladë “Made in Flor Mumajesi”

Brenda një harku të shkurtër kohor këngëtarja Argjentina Ramosaj arriti të pushtojë ekranet muzikore shqiptare. Kështu, prej disa ditësh publiku po shijon klipin e saj të dytë të titulluar “Tip”, i cili duket se ka rezultuar i vlerësuar. Megjithatë Ramosaj nuk mjaftohet me kaq. Aktualisht është duke punuar edhe për tjetër hit. Bëhet fjalë për një baladë, e cila pritet të transmetohet në televizionet muzikore në fund të këtij muaji. Kënga titullohet “Jeta vazhdon” dhe është e kompozuar nga Florian Mumajesi. Një tjetër pasion i Argjentinës është dhe modelingu, të cilin ajo e ushtron prej kohësh. Një vajzë simpatike dhe e suksesshme ngjall interes për të ditur edhe më shumë për të. Si shkon jeta e saj private? Arrin ajo të gjejë kohën e duhur për partnerin? Mësojini më poshtë.

Nga Vilma Kerciku

Argjentina brenda një kohe shumë të shkurtër arritët të hyni fuqishëm në tregun muzikor shqiptar. Sa krenare ndiheni në lidhje me këtë fakt?

Jam shumë krenare dhe ndihem e kënaqur me arritjet dhe punën që kam bërë, si unë ashtu edhe i tërë stafi që ka marrë pjesë në realizimin e këtyre sukseseve.

Mendoni se fama juaj e menjëhershme mund të ketë ngjallur xhelozi për shumë kolegë të tjerë?

Jo, s’e besoj. Shumica prej  kolegëve janë miq shumë të dashur për mua, ndaj gëzoj respekt dhe admirim për të gjithë ata.

Nuk ka shumë javë që keni lançuar klipin tuaj të dytë që titullohet “Tip”. Përse ky titull? Thjeshtë të veçoj një person me tipare dhe karakter stereotip që shprehet shumë shpesh në dominimin dhe manipulimin me femra, apo anasjelltas dhe në një mënyrë t’i bëj femrat më alerte dhe të njohura me këto veti kaq mirë të “kamufluar”.

Teksti këngës suaj është në dy gjuhë, shqip dhe anglisht, përse?

Kam vendosur ta realizoj këtë këngë në dy gjuhë, sepse kur e kam lançuar këngën (videoklipin) e parë të titulluar “Shpirti i mbytur” është pritur shumë mirë dhe kam patur shumë komplimente dhe kërkesa nga shumë njerëz, miq, kolegë, fansa, adhurues, që këngën e ardhshme ta realizoj në dy gjuhë që edhe dëgjuesit ndërkombëtarë ta kuptojnë tekstin.

Kënga juaj është realizuar në bashkëpunim me një studio produksioni në Holandë. Çfarë ju shtyu që ta realizonit atje? Për disa kohë kam qëndruar së bashku me Valonin (të  fejuarin) në Holandë, pasi ne kemi disa adresa që sipas nevojës i vizitojmë, apo qëndrojmë. Stafi i produksionit janë miq të mirë dhe të vjetër të Valonit, kështu që lindi ideja që të bashkëpunojmë dhe pati shumë sukses.

Ndërkohë ju jeni duke realizuar një tjetër klip në bregdetin shqiptar. Na flisni pak më shumë rreth tij. Si titullohet dhe kur do të lançohet? Po, është e vërtetë. Është një këngë baladë kompozuar nga Flori Mumajesi. Kënga titullohet “Jeta vazhdon” dhe besoj se do të lançohet në fund të shtatorit.

Përse vendosët që t’i realizoni këngët fill njëra pas tjetrës? T’ju them të drejtën kjo nuk është bërë qëllimisht. Këngën “Tip” e kam incizuar kohë më parë dhe në atë periudhë isha shumë e ngarkuar me mësime (studime) dhe mu desh që ta shtyja për një kohë, derisa të përfundoja provimet dhe kur të shkoja më pas në Holandë do e kisha më të lehtë që të realizoja videoklipin.  U realizua dhe më pas u lançua.

Sa të aftë e ndjeni veten për të marrë pjesë në festivalet shqiptare? Po, kam shumë vetëbesim që jam e përgatitur dhe e aftë të marr pjesë në çdo festival, apo manifestim të tillë.

Dhe a është në objektivat tua pjesëmarrja në “Kënga Magjike 2010-të”? Patjetër. Do të mundohem që këtë vit nëse mundem, të përgatis në kohë një këngë për këtë festival. Kam nderin dhe dëshirën e madhe të jem pjesë e tij.

Po, ndonjë duet keni në plan? Për momentin jo, ndërsa në  të ardhmen natyrisht që po.

Përveç projekteve që përmendëm më lart, çfarë bën pjesë tjetër në planet tua? Albumi, koncerte të shumta dhe shumë kontribute që dua t’i realizoj.

Keni një miqësi të dukshme me Flori Mumajesin, si edhe me Elvana Gjatën. Çfarë ju lidh me ta dhe si jeni njohur? Po, e vërtet. Me Florin jam njohur nëpërmjet muzikës. Në Tiranë jemi takuar pas një kohe duke realizuar një projekt dhe më pas aty filloi edhe lidhja jonë profesionale, po ashtu miqësore. Me Elvanën jam takuar në Tiranë në studion e Florit dhe që atëherë jemi bërë mikesha shumë të afërta. Kam shumë respekt dhe i dua shumë si miq. Janë shumë të dashur dhe më kanë pritur me duar hapur.

Argjentina ju merreni edhe me modeling. Sa kohë i kushtoni kësaj pjese? Po, modelingu është një nga pasionet e mia që e bëj me shumë qejf.  Për momentin nuk është se kam ndonjë objektiv në modeling, pasi jam në lëvizje mes Kosovës dhe Shqipërisë. Por mendoj që kur të kthehem në Holandë do të vazhdoj të merrem me modelingun, pasi më presin oferta të ndryshme dhe kam dëshirë t’i realizoj.

Dhe cila ka qenë sfilata e fundit në të cilën keni marrë pjesë?

Sfilata e fundit ka qenë për Glamour Fasion.

Mendoni se do ta lini disi pas dore modelingun, duke qenë se një pjesë të konsiderueshme të kohës jua zë dhe muzika? Nuk besoj. Ndoshta s’do të jem shumë aktive, por do të jetë e pranishme në jetën time. Domethënë do gjej hapësirën e duhur për të dyja.

Nëse do të duhej që të zgjidhje, kë do të veçoje mes tyre? Muzikën. Është më personale.

Flasim pak për jetën tënde private. Sa kohë keni e fejuar dhe si jeni njohur me Valonin? Jam njohur me të para katër vjetësh, mes miqve tanë të përbashkët. Ishim vetëm shokë në fillim, por e dija që ai më simpatizonte, gjithashtu edhe unë atë. Pas dy vjetësh rastësisht më ftoi në një festë për studentë (pasi ai atëherë ishte student) dhe aty filloi lidhja mes nesh. Prej asaj kohe, ka dy vjet që jemi fejuar.

Sa ju mbështet ai në rrugën që keni zgjedhur? 100% . Jam shumë e lumtur që kam pranë vetes një person si Valoni.  

Po Valoni me çfarë merret? Valoni merret me udhëheqjen e investimeve Holandeze në Kosovë dhe Ballkan dhe është drejtues i kompanive Holandeze “Zinkunie dhe Bidec”.

E bezdis sadopak fama juaj? Jo, aspak. Valoni është shumë përkrahës dhe krenar për çdo sukses që arrij.

Sa kohë i kushtoni njëri-tjetrit? Gati tërë kohën. Mundohemi që të jemi së bashku sa më shumë, duke koordinuar dhe sinkronizuar takimet dhe punët që kemi.

Ku jetoni më së shumti?

Deri më tani kemi jetuar më shumë në Holandë. Kohët e fundit do të jemi më shumë në Kosovë dhe Shqipëri, pasi Valonit dhe mua na përshtatet më së shumti, për punët dhe realizimet që  kemi planifikuar për të ardhmen.

Kush është më shumë xheloz nga ju të dy? Më duhet ta pranoj se unë (qesh).

Me subjektin e cilit film ju përngjan më shumë historia juaj e dashurisë?

“The Notebook”

Game Over