Kategoria e parë starton me rezultate surprizë

Sot, në disa prej stadiumeve të vendit, ka nisur kampionati kombëtar i kategorisë së parë. Edhe pse jo e plotë, pasi federata nuk po vendos dot për çështjen “Partizani”, ndaj nuk do të luhej në Pogradec, ngritja e siparit të kategorisë së parë i ka grishur tifozët e vet. Sipas skuadrave respektive, të cilat nuk janë pa histori, të tilla si Partizani, Apolonia, Tomori, Besëlidhja, Lushnja, Luftëtari etj. Çka ngërthente edhe një interes të madh, për këtë futboll, të ashtuquajturin “të vogël”, sepse vjen pas Superligës. Ballafaqimet interesante nuk kanë munguar qysh sot, në premierë, kështu që futbolli ynë zgjeron “gjeografinë” e futbollit të luajtur, shton “adrenalinën” e kësaj loje magjike. Sa u takon cifteve të javës së parë të kampionatit të kësaj kategorie, vlen të evidentohet sfida e Lezhës, mes dy skuadrave me jo pak emër në futbollin shqiptar. Besëlidhja vendase, e përforcuar ndjeshëm në këtë edicion, me pretendime serioze për t’u ngjitur më lart, ka pritur Apoloninë e Fierit, edhe ajo në të njëjtën “gjatësi vale“. Lezhjanët janë befasuar nga miqtë, teksa e kanë parë veten në disavantazh të një goli në pjesën e parë, cka ua ka shtuar më shumë ankthin dhe ngërcin psikologjik. Para një mase të madhe tifozësh, lojtarët e Besëlidhjes e kanë pasur të pamundur të dilnin në lojën e tyre. Sidomos në 45 minutat e para, të cilat i kanë mbyllur me humbje. Në pjesën e dytë, fierakët i kushtojnë më shumë rëndësi mbrojtjes, ndërsa vendasit shtojnë forcat sulmuese. Duke tentuar furishëm për të barazuar. Objektiv të cilit ia kanë arritur me kalimin e minutave, me anë të Alcanit, por pa mundur dot të shkojnë më tej, te fitorja. Pra, dy skuadrat kanë ndarë nga një pikë, cka ka lënë më shumë të kënaqur fierakët, që luanin në transfertë. Një përballje debutuesish në kategorinë e parë është regjistruar në Vlorë, aty ku skuadra e dytë e qytetit bregdetar, me të njëjtin emër, Vlora, ka pritur Tomorin e Beratit. Miqtë kanë zhvilluar një merkato të fuqishmë, nën drejtimin e presidentit të ri Ali Dyrmishi, ndërkohë që “labët“ kanë ndryshuar në mënyrë krejt të ciditshme trajnerin, pak ditë më parë, me shkakun absurd të rezultateve të dobëta në ndeshjet miqësore testuese para edicionit të ri. Ka triumfuar grupi më cilësor i beratasve, por edhe individualitetet e tyre, falë dy golave, nga një në secilën pjesë. Fillimisht ka realizuar Caushaj, një lojtar i spikatur në superligë edicionet e shkuara, për të barazuar vlonjatët me një penallti, por përkohësisht, sepse Tomori e ka gjetur sërish rrugën e fitores përfundimtare. Me anë të Klevis Roshit, edhe ky lojtar i spikatur në ekipet elitare të vendit. Nisje e bukur e beratasve, të cilët duket se do të jenë “kryefjalë” e kategorisë së parë këtë kampionat, me ambicie të mëdha për t’u rikthyer në superligë, pas disa vitesh në kategoritë inferiore. Luftëtari i Gjirokastrës priti një debutues tjetër në kategorinë e parë, në fushën e vet, pikërisht Mamurrasin e qytezës me të njëjtin emër, pjesë përbërëse e Kurbinit. Me të cilin nuk ka shkuar dot më larg se një barazim i bardhë 0-0. Burreli udhëtoi drejt Bilishtit, për t’u ndeshur me skuadrën vendase, ndaj të cilit provoi edhe avantazhin e dyfishtë, 2-0, deri rreth gjysmë ore para mbarimit të lojës, por më pas u barazua, duke humbur mundësinë e artë të nisjes së garës me një 3-pikësh. Megjithatë, edhe barazimi në transfertë nuk duket keq për matajanët, ndërsa ndryshon puna për bilishtarët. Që janë frenuar në shtëpinë e tyre qysh në javën e parë. Kamza ka qenë mysafire e Adës, në Velipojë, ku ka triumfuar pastër, me rezultatin 3-1. Pavarësisht se ka pësuar gol që herët, skuadra e drejtuar nga Eduard Zhupa ka pasur forca të reagojë dhe të përmbysë gjithcka, duke ikur nga Velipoja me 3 pikë, të cilat tregojnë edhe pretendimet reale të kamzalinjve. Me fitore, edhe pse minimale, e ka nisur Tërbuni i Pukës. Që ka mundur Gramozin e Ersekës, duke marrë 3 pikët e para në rikthimin e vet në kategorinë e parë. Lushnja ka luajtur “si macja me miun” me Gramshin, të cilin e ka mundur me lehtësi, 3-0. Më telegrafikisht, ja edhe pasqyra e cifteve të javës së parë të kategorisë së parë.

Bilanci i çifteve të javës së 1‑rë të kategorisë së parë
11.09.2010, ora 16:30
LUSHNJA – GRAMSHI 3-0
Shënues: Galica 40’ (pen), Varfi 45’, Xhata 48’
Stadiumi “Roza Haxhiu”
Gjyqtar: M.Dervishi

ADA – KAMZA 1-3
Shënues: Lleshi 8’ / Dalipi 14’, 90’, Capo 37’
Fusha sportive e Velipojës
Gjyqtar: K.Cjapi

LUFTËTARI ‑ MAMURRASI 0-0
Stadiumi “Gjirokastra”
Gjyqtar: B.Breshanaj

BILISHT S. – BURRELI 2-2
Shënues: Drabaj 72’, Tiko 82’ / Gjoka 45’, 55’
Stadiumi i Bilishtit
Gjyqtar: S.Bogdani

VLORA – TOMORI 1-2
Shënues: Rustemi 65’ (pen) / Caushaj 54’, K.Roshi 86’
Stadiumi “Flamurtari”
Gjyqtar: E.Hoxha

BESËLIDHJA ‑ APOLONIA 1-1
Shënues: Alcani 72’ / Ribaj 32’
Stadiumi “Brian Filipi”
Gjyqtar: A.Janku

TËRBUNI – GRAMOZI 1-0
Shënues: Guri 37’
Stadiumi “Ismail Xhemali”
Gjyqtar: A.Beqiri

E shtyrë
POGRADECI ‑ PARTIZANI
Stadiumi “Gjorgji Kyçyku”